पुणे : औंध येथील रयत शिक्षण संस्थेच्या प्राथमिक विद्यामंदिरातील पहिली ते चौथीच्या विद्यार्थ्यांची मोफत दंत तपासणी करण्यात आली. डॉ. बाबासाहेब आंबेडकर महाविद्यालयातील अर्थशास्त्र विभागाने जिल्हा रुग्णालयाच्या सहकार्याने या शिबिराचे आयोजन केले होते. डॉ. आंबेडकर महाविद्यालयाचे प्राचार्य डॉ. शिवलिंग मेनकुदळे यांच्या मार्गदर्शनाखाली हे शिबिर घेण्यात आले.
डॉ. एस. आर. घाणेकर, डॉ. हेमंत लेंडे यांनी विद्यार्थ्यांना दातांची काळजी कशी घ्यावी, दातांची नियमित स्वच्छता कशी ठेवावी, कोणते पदार्थ जास्त खाऊ नयेत, आहारामध्ये कोणते पदार्थ असावेत यासंदर्भात मुलांना; तसेच पालकांनाही मार्गदर्शन केले. मुलांच्या दातांची तपासणी करून, पुढील औषधोपचाराची आवश्यकता असलेल्या विद्यार्थ्यांना पालकांसोबत जिल्हा रुग्णालयात येण्याचे आवाहन केले.
प्राथमिक शाळेचे मुख्याध्यापक अरविंद जाधव आणि सर्व वर्गशिक्षकांनी या शिबिरासाठी पुढाकार घेतला. कार्यकमाचे प्रास्ताविक प्रा. नलिनी पाचर्णे यांनी केले. डॉ. हर्षद जाधव यांनी आभार मानले. अर्थशास्त्र विभागातील सागर आढाव, विलास राऊत, सचिन शेळके या विद्यार्थ्यांनी सक्रीय सहभाग घेतला.